ကျုံပျော် မြို့နယ်၌ အသုဘချခွင့်မရဘဲလမ်းပိတ်ထားသဖြင့် ရွာလမ်းမကြီးတွင် အလောင်းချထားရ
ဧရာဝတီတိုင်း၊ ကျုံပျော် မြို့နယ်၊ ဇင်ပြွန်းကုန်းကျေးရွာက ရွာလယ်လမ်းမကြီးကို အယူသီးဒေသခံတချို့က အလောင်းဖြတ်သယ်ပြီး အသုဘချခွင့်မပေးတဲ့အတွက် ရွာလမ်းမကြီးမှာပဲ အလောင်းချပြီး အသုဘမြေချခွင့်ရဖို့ ညှိနှိုင်းနေရပါတယ်။ ဇင်ပြွန်းကုန်းကျေးရွာအရှေ့ပိုင်းမှ ကွယ်လွန်သူ ဒေါ်သန်းသန်းနွယ်၊ အသက်(၄၉) နှစ်ရဲ့ ရုပ်အလောင်းကို နိုဝင်ဘာ ၁၆ ရက်က ရွာလယ်လမ်းမကနေ သုဿာန်ကိုပို့ဆောင်ဖို့ သယ်ဆောင်လာတာမှာ ရွာအနောက်ခြမ်းက ဒေသခံတချို့နဲ့ ရဲတပ်ဖွဲ့ဝင်တွေ ပူးပေါင်းတားဆီးခဲ့တာပါ။
ရွာအနောက်ခြမ်းက ဒေသခံတွေကတော့ အစဉ်အလာဓလေ့အရ ရွာလယ်လမ်းကသယ်ဖို့ ခွင့်မပြုဘဲ ရှေးလူကြီးတွေ အသုံးပြုခဲ့တဲ့အတိုင်း ရွာရဲ့ကျွဲလမ်းကိုသာအသုံးပြုဖို့ ပိတ်ဆို့တားဆီးခဲ့တာပါ။
အသုဘရှင်တွေကတော့ ရွာကျွဲလမ်းဟာ အိမ်သာကြို အိမ်သာကြားကနေ သွားနေရတာနဲ့ ရွာအနောက်ခြမ်းက အသုဘဖြစ်ရင်တော့ ရွာလယ်လမ်းမကြီးကို သုံးခွင့်ရတာဟာ တစ်ရွာထဲသားချင်း ခွဲခြားတာဖြစ်တယ်ဆိုပြီး အလောင်းစင်ကို ရွာလယ်လမ်းမကြီးမှာပဲ ချထားတာဖြစ်တယ်လို့ အသုဘရှင်တွေက ပြောပါတယ်။
ကွယ်လွန်သူရဲ့ ခင်ပွန်းဖြစ်သူ ဦးအေးစိုးက “အများပြည်သူပိုင်လမ်းဖြစ်တဲ့ ရွာလယ်လမ်းမက ချမရဘူးပြောတယ်။ ရဲတပ်ဖွဲ့နဲ့ အသုဘချမရအောင် တားထားတယ်။ သူတို့ချခိုင်းတဲ့လမ်းက အိမ်သာကြို၊ အိမ်သာကြား လူမပြောနဲ့ ခွေးတောင်မသွားတဲ့လမ်းမို့ ကျနော့် မိန်းမကို အဲဒီလမ်းကနေ မပို့နိုင်ဘူး။ မရရင် ရွာလယ်လမ်းမှာပဲ အလောင်းကို ဒီတိုင်းချထားမယ်” လို့ ပြောပါတယ်။
အဲဒီလို အသုဘချဖို့ အခက်အခဲဖြစ်နေတဲ့ အခြေအနေကြောင့် ကျေးရွာမှတာဝန်ရှိသူတွေ နဲ့ ဘာသာရေး ခေါင်းဆောင်တွေညှိနှိုင်းနေပြီး အသုဘချရာလမ်းကိုအကြောင်းပြုပြီး ရွာမှာ အုပ်စုနှစ်စုအကြား မလိုလားအပ်တဲ့ ပဋိပက္ခတွေ မဖြစ်ပွားစေဖို့ ရဲတပ်ဖွဲ့ဝင်တွေနဲ့ မြို့နယ်တာဝန်ရှိသူတွေ လာရောက်စောင့်ကြပ် လုံခြုံရေးယူထားရပါတယ်။
လတ်တလော ရဲတပ်ဖွဲ့ဝင် ၅၀ လောက်က ရွာအလယ်က တားဆီးထားတာကြောင့် အသုဘအလောင်းကို နိုဝင်ဘာ ၁၆ ရက် ညနေပိုင်းကလည်း လမ်းမကြီးအလယ်မှာပဲ ညအိပ်ချထားခဲ့ရတယ် လို့ ဒေသခံတွေက ပြောပါတယ်။
ဇင်ပြွန်းကုန်းကျေးရွာအုပ်ချုပ်ရေးမှူး ဦးအေးအေးထွေးက “ရှေးနှစ်ပေါင်းများစွာကတည်းက ကျင့်သုံးလာတဲ့ ရပ်ရွာဓလေ့စည်းကမ်းဖြစ်နေတော့ ရွာလယ်လမ်းမကတော့ ချမရဘူး။ ရွာရဲ့ဓလေ့အရ တားတာ။ ဘေးနားကကျွဲလမ်းကလည်း ကောင်းနေပြီ။ အဲဒီက ချလို့ရပါတယ်။ ရွာမှာ အခုလိုဖြစ်နေတဲ့ကိစ္စတွေ အဆင်ပြေဖို့က ရွာအရှေ့ပိုင်းမှာ သုဿာန်တစ်ခုဆောက်မှ အဆင်ပြေနိုင်မယ်။ သုဿန်ဆောက်ဖို့ကို တင်လည်းတင်ပြထားပါတယ်” လို့ ပြောပါတယ်။
ဇင်ပြွန်းကုန်းရွာမှာ လွန်ခဲ့တဲ့ အောက်တိုဘာ ၂၇ ရက်ကလည်း အသုဘတခုကို ရွာနောက်ပိုင်းနေဒေသခံတချို့က ရွာလယ်လမ်းမကြီးကို အလောင်းဖြတ်သယ်ပြီး အသုဘချခွင့် မပေးတာကြောင့် ရဲအင်အားလုံခြုံရေးတင်းကြပ်ပြီး အသုဘချခဲ့ရပါတယ်။
အများပြည်သူပိုင်တဲ့ လမ်းကို အသုံးပြုခွင့်မပေးတာဟာ လူ့အခွင့်အရေး ပိတ်ပင်တာဖြစ်တယ် ပြည်သူတွေကဒါကို လက်မခံလို့ အခုလိုပေါက်ကွဲထွက်လာပြီး ရွာလည်လမ်းကို အသုဘချဘို့ကြိုးစားတာဖြစ်တယ်လို့ နာရေးချဖို့ကြိုးစားနေတဲ့ ရွာအရှေ့ပိုင်းက ဦးမြင့်ဆွေကပြောပါတယ်။
အရင်ကတော့ အခုလိုပြဿနာမျိုးသုံးကြိမ်လောက်ဖြစ်ပွားခဲ့ပြီး အုပ်ချုပ်ရေးက အစဉ်အဆက် အသုံးပြုနေတဲ့လမ်းကိုသာ အသုံးပြုဖို့ ဆုံးဖြတ်ခဲ့ကြတယ်လို့ ကျေးရွာအုပ်ချုပ်ရေးမှူး ဦးအေးအေးထွေးကပြောပါတယ်။
မူလအသုံးပြုနေတဲ့ လမ်းဟောင်းဟာ မိုးတွင်းမှာ လမ်းမကောင်းတာကြောင့် လို့ဆိုတာကြောင့် တိုင်းဒေသကြီးလွှတ်တော်ကိုယ်စားလှယ် ဒေါ်သီတာဇင်က လမ်းကောင်းအောင် ဆာင်ရွက်ပေးဖို့ လာရောက်ညှိနိုင်းပေးခဲ့ပေမယ့် နာရေးချမယ့် အဖွဲ့က ရွာလည်း လမ်းမကြီးအတိုင်းသာ ဆောင်ရွက်မယ်ဆိုတာကြောင့် ဆက်လက် ညှိနှိုင်းနေဆဲဖြစ်ပါတယ်။
Credit: DVB
No comments:
Post a Comment